Kua whakatūria te Tumu Whakarae Kairīwhi hou o Te Mātāwai
Pānui Pāpāho
Kua whakatūria a Toko Kapea (nō Ngāti Apa ki Rangitīkei, nō Taranaki Whānui, nō Te Ātihaunui-a-Pāpārangi me Ngāpuhi) hei Tumu Whakarae Kairīwhi hou o Te Mātāwai.
He nui tōna mōhioranga mō te mahi whakahaere, ā, he kaiārahi anō ia o Tū Partners Limited, he kamupene e arotahi ana ki ngā take ā-ture o te ao pakihi, ki ngā mahi pakihi me te whakawhanaketanga o te ōhanga Māori.
"He hōnore nui taku whakawhiwhinga ki tēnei tūranga ki roto i tētahi whakahaere e whakapau kaha ana ki tēnei mahi rangatira, arā, ko te whakarauoratanga o te reo Māori."
"Nā runga anō i aku mahi ki te taha o Te Mātāwai e pā ana ki ētahi o ngā kaupapa here me ngā kaupapa rautaki, he koanga ngākau nōku te mahi ngātahi ki te Poari me ngā kaimahi ki te hāpai i te ahunga whakamua o ngā whāinga nui mō te reo Māori," te kī a Toko.
Kei te mihi atu ngā Hoa-Toihau o Te Mātāwai, arā, a Brenda Soutar rāua ko Mātai Smith ki a Toko, hei tā rāua, he tūranga matua tōna i roto i ngā mahinga rautaki kia kitea rā anō te Tumu Whakahaere tūroa hei te Tau Hou Pākehā.
"Pārekareka ana ki a māua ki te kite atu i ngā momo pūkenga e mauria mai ana e Toko, arā, he rōia, he tangata whakaaro whānui, he kaitāpae kōrero hoki ia, ā, koia anō te Tumu Whakarae o mua o Te Ara Poutama Limited.
"He whānui kē ōna pūkenga e pā ana ki ngā mahi whakahaere, ki te mahi pakihi me ngā whakataunga Tiriti," te kī a tētahi o ngā Hoa-Toihau o Te Mātāwai, arā, a Brenda Soutar.
Kei te mihi hoki te Poari ki a Karl Smith, nāna te tūranga o te Tumu Whakarae Kairīwhi i kawe i tēnei tau, i tōna ngākaunui ki ngā kaupapa Māori, he āhuatanga e āta kitea ana i āna mahi huhua i roto i ngā tau. Ka mahi tonu a Karl ki Te Mātāwai hei Kaiwhakahaere Rangatōpū.
-KUA MUTU-