Ā mātou mahi
He tūranga nui tō tēnā me tēnā rōpū i raro i tō mātou anga whakahaere. He pūkenga motuhake, he tirohanga motuhake tō ia rōpū e tino whai hua ai ngā whakapaunga kaha a te katoa.
He wāhi mahi tino motuhake a Te Mātāwai e kitea ai ngā momo āhuatanga ahurei e kore e kitea ki wāhi kē. E 27 ō mātou kaimahi whakahirahira. He Māori te nuinga, kei raro iho i te 35 tau te pakeke. He hua nā te kōhanga reo me te kura kaupapa Māori e mōhio ana ki te kōrero i te reo, e noho ana i raro i ngā tikanga Māori kei te poho o ō rātou hapori.
He Māori e noho ana hei Māori. E tino hāngai ana ngā ngākau o ō mātou kaimahi ki te wawata nui, ā, kei te mārama pū rātou ki te kaupapa o Te Mātāwai, arā, kia ūkaipō anō te reo. He mea nui ēnei āhuatanga katoa mō te whakatinanatanga o ngā putanga whakahaere, ā, kei te whakapakarihia ō mātou whakapaunga kaha e ēnei tāngata me ō rātou tirohanga.
Kua whakatūria te hanga o ngā whakahaere hei tautoko i ngā hapori ki te ārahi i te whakarauoratanga ake o te reo Māori. Kei te mārama a Te Mātāwai, ka whanake, ka tipu pai ai ngā mahi a te hapori mēnā e tika ana te whāngai o ngā rauemi hei tautoko i ngā mahi. Me tautoko hoki te Poari, te tari me ngā mātanga reo o ia Kāhui e whakapāpā atu ana ki ngā whānau me ngā hapori ki te tuku atu i ngā ratonga me ngā pārongo ki ngā rohe. He mea nui anō ngā huihuinga whaihua ki ō mātou hoamahi i raro i te Minita me te hunga e whaipānga ana ki ngā take reo Māori.
E poipoia ana ngā huanga o te takitini e tētahi momo mahi whakahaere e whakatairanga ana i te kaupapa me te ahunga whakamua o tētahi kāhui kotahi, kia mārama ai ia tangata ki tana tūranga i raro i te horopaki whānui o ā mātou whāinga. Nā runga anō i te kotahitanga me te whanaungatanga i waenga i ngā kaimahi, kei te hīkina ō mātou pūkenga rerekē, ā, kei te hāngai hoki te titiro ki ō mātou whāinga rautaki.
