E toru ngā kaupapa whakarauora reo ka whakanuia mō te tau 50 o Te Wiki
Pānui Pāpāho
Tērā ētahi hapori e toru e hapahapai ana i te whakahaumanutanga o te reo Māori mā te whakahaere kaupapa tūhāhā ki a rātou me ō rātou hāpori.
Ko Kaharau rāua ko Anaru Keogh o Te Reo Mau-ri, ko Karangawai Marsh rāua ko Tania Te Tau o RaRau Mai, ko Kiharoa Milroy o Te Kura Reo o Ngāti Whakaue te hunga e whakakanohi ana i ngā tini ara o te reo Māori i te whakatairanga a Te Mātāwai, a Takahia tō Ara.
Ka takatakahia te whakatairanga i te motu whānui – mai i tētahi wānanga mau rākau mō ngā rangatahi i Kirikiriroa, ki tētahi karaehe toi mō ngā whānau i Te Papaioea, ka mutu, ki tētahi kura reo mō te iwi o Rotorua.
Hei tā te Tumu Whakarae Rīwhi o Te Mātāwai, a Karl Smith, e whakamīharo ana ia ki tā Aotearoa whānui whakanui i te tau 50 o Te Wiki o Te Reo Māori. Waihoki, e poho kererū ana a Te Mātāwai ki te whakatamarahi i ngā kaupapa reo ā-hapori e tautokona ana e mātou.
“Ko ō mātou hapori te manawa kapakapa o ngā mahi whakarauora reo. He mea nui ki a mātou kia mihia te hunga nā rātou i whai huruhuru ai ēnei kaupapa mā Takahia tō Ara” te whakamiha a Karl.
Ahakoa te rerekē o ngā ara reo Māori ka takahia e ēnei kaupapa, he rite tonu ngā whāinga matua o te katoa: ko te tukuihotanga me te whakawhānui i ngā hononga hapori reo.
He kaupapa a Rarau Mai mā ngā tamariki me ō rātou mātua e ngākau titikaha ana ki te kōrero i te reo Māori i te kāinga, i tua tatu anō hoki, mā roto i te mahi toi.
E ai ki te Hoa-Toihau o RaRau Mai, ki a Tania Te Tau, “I tupu mai a RaRau Mai i te hiahia o tō mātou hapori ki ētahi wāhi e noho rumaki ai te reo Māori.”
Kua heke iho te mahi tuihono a te hunga taiohi o Waikato, ā, kua piki ake te mahi tūhono ki ōna tikanga, tōna reo me tōna taiao mā roto i te mau rākau.
Ko tā te Pouako, a Kaharau, "Ko Te Reo Mau-ri tēnei. He huarahi e ohomauri ai tō reo, e ohomauri ai te ngākau, ki te hāpai i te rākau ki te oranga o te tinana me te oranga o te hinengaro."
Huihui ana ngā uri o Ngāti Whakaue i waenga i ngā ngāwhā o Rotorua, hei whakamomona i te reo o te whānau mā roto i ngā terenga kura reo.
“Ko te mahi nui a te hapori me ngā whānau Māori, he ako i te reo Māori me te whāngai i roto i ngā kāinga. Ka māori noa te reo Māori ki ngā tamariki, nā, ka māori noa te reo Māori i a rātou e hikoi ana i ā rātou ara,” te whakakipakipa a Kiharoa, te kaiwhakahaere o te kura reo.
-KA MUTU-