Ko Tākuta Te Rina Warren i tohua hei mema hou mō Te Poari o Te Mātāwai
Pānui Pāpāho
Nei te reo pōwhiri a ngā Hoa-Toihau o Te Mātāwai, a Mātai Smith rāua ko Brenda Soutar, ki a Tākuta Te Rina Warren (o Rangitāne, o Maniapoto, o Mōkai Pātea ki Whitikaupeka), te mema hou o Te Poari o Te Mātāwai.
Kua tohua a Tākuta Warren e te Minita Whanaketanga Māori, a Hōnore Tama Potaka. Ka tō mai ko ōna pūkenga i roto i ngā Mātauranga Māori me ngā Mātauranga o Ngā Iwi taketake, i roto hoki i ngā mahi rangahau i te ahurea hangarau me te whakawhanake hapori. Huihui ēnei mātauranga tōtōpū katoa hei taunaki i te tūruapo o te poari - ki te whanake i te tukuihotanga o te reo Māori me te whakakotahi hoki i ngā hapori reo Māori.
Hei tā te Hoa-Toihau o Te Mātāwai, a Brenda Soutar, “kua whakarauora e Te Rina i te reo Māori hei reo tuatahi ki tōna kāinga me tōna hapori hoki, ka mutu he whakatupu i tāna tamāhine ki te reo Māori mā te huarahi o Te Matakahuki, mai i te kōhanga reo tae noa ki te kura kaupapa Māori. Mō ngā tau 25, neke atu, he kaha tonu a Te Rina i roto i ōna mahi hāpai i Te Aho Matua.”
Mā ōna hononga ki ngā iwi me ngā marae, me tōna kaha hoki ki te hāpai i ngā kura kaupapa Māori, e whakaū ai ngā wheako a Tākuta Warren i roto i ngā hononga hapori me ngā take rangatiratanga.
Ko te kaupapa matua āna mahi ki Te Kunenga Ki Pūrehuroa - Massey University ko te whanaketanga o ngā tikanga Māori i roto i ngā wā o nāianei, te purenga ihomatua, waihoki he taupatupatu, he tautohe i ngā pūrākau-pakiwaitara me ngā hītori tātāmi. Mā roto i āna whakaakoako, e tārai ana a Tākuta Te Rina Warren i te tirohanga o te tangata me te whakatinanatanga o nāianei hoki i ngā kaupapa tuakiri Māori, te reo Māori me ngā tikanga whakahaere.
Nei te reo whakamiha a te poari ki a Reikura Kahi, te māngai o te Minita e heke ana i tēnei tūranga, mō tōna kaha ki te hapai i te poari nō te wā i piri mai ia i te marama o Mei 2019. Waihoki, mōna i tū hei Hoa-Toihau mai i te marama o Hanuere 2021 ki te marama o Akuhata 2025. Arā noa atu ngā tūranga a Reikura o waho atu o Te Mātāwai. Katoa o ngā tūranga nei he tautoko i te whakarauoratanga o te reo Māori ki taumata anō, ka mutu he hapai i ngā whānau kia mōhio ai rātou ki ō rātou ake pitomata.
KA MUTU