Neke noa atu i Mua te Whakautua o te Karanga e Ngāi Māori, Kōpaka tonu ana te Pūtea

E mārama ana te tipu tonu o te ngākau nui, te ngākau pūmau o ngā iwi, ngā hapū me ngā whānau puta noa i Aotearoa ki te whakarauora i te reo Māori. 

Muia ana Te Mātāwai, te hinonga ā-ture motuhake e mahi ana mā ngāi Māori ki te whakarauora i te reo Māori, e te tono i ngā whānau Māori, ngā marae, te kāinga, te hapori me te iwi ki te Hōtaka Haumitanga 2023, tētahi pūtea whakataetae.

Tau mai ana ki Te Mātāwai i tēnei tau ētahi tono e rima rau, tata ana ki te kotahi rau ōrau te pikinga ake o tēnei i tērā tau.

Hei tā Reikura Kahi, hoa-toihau o Te Mātāwai, “E tohu ana te kaha piki o ngā tono pūtea i te mātau haere o te iwi, e whakamiramira ana i te nui o tō rātou ngākau pūmau ki te whakarauora i te reo Māori.”

Heoi anō, kei tua noa atu te piki o ngā tono mō te kaupapa whakarauora i te pūtea e tukua ana ki Te Mātāwai.

Nō tēnei tau rawa i $39 miriona ai te tapeke o ngā tono katoa i tae atu ki Te Mātāwai, engari $10.8 miriona noa te rohenga pūtea ki a ia hei toha māna.

I tēnei rā, kua riro i Te Mātāwai te pikinga pūtea o te $2.606 miriona, nā reira, kua eke te whakawhiwhinga pūtea katoa ki te $17.3 miriona.

Whakamārama ana te Tumu Whakarae o Te Mātāwai, a Poia Rewi, “Ko tētahi uauatanga o te mahi ko te piki ake o te rongo kōrero i te kaitono ngākau kore haere he tau, i te korenga e whiwhi i te kore e rawaka o te pūtea.  Nō reira, e mihi ana ki te pikinga ake o te pūtea.”

I whakatūria Te Mātāwai e whitu tau ki mua. Ahakoa te mōhiotia ake o te hiranga o te reo Māori ki te motu, me te piki ake o ngā rohenga pūtea ki ngā umanga Karauna, kātahi anō a Te Mātāwai ka piki ake te pūtea.

Mārama ana te kōrero a Te Poari o Te Mātāwai ki ngā Minita o Te Rūnanga Reo me Te Komiti Whiriwhiri Take Māori, e whakapuaki ana i te hiahia kia piki te pūtea hei whakaāhei, hei whakamana i te hunga e āta mahi ana i temahi. 

Ko te kupu whakatepe a te hoa-toihau, a Bernie O’Donnell, “Ahakoa te hau mai o te rongo pai i te rā nei, ka hia tau atu te ara nei e whāia ana e ūkaipō anō ai te reo, ka mutu, ka haere tonu tā mātou kōkiri kia nui atu te rauemi arotahi ki te whakarauora i te reo me ōna tikanga.”

Kia ūkaipō anō te reo, ka reo mauri ora!

--KA MUTU--